Alumnado do Leliadoura acada o Premio Oceántica

O xurado do I Congreso Xuvenil Internacional OCEÁNTICA13 ven de premiar o traballo de Francisco Rodríguez Crujeiras e Serxio Fernández Ramallo, alumnos de 4º ESO do IES Leliadoura.

O traballo premiado, que enlazamos a continuación e ten por título "Efectos do Prestige no pobo de Aguiño", consiste nunha breve reportaxe sobre o impacto medioambiental causado pola catástrofe do Prestige nesta vila ribeirense.

Como premio, Fran e Serxio poderán participar no Campus Científico que se celebrará no albergue xuvenil "A Devesa" de Ribadeo no mes de agosto

Parabéns aos gañadores!!

Aula Específica: Proxecto Pedras

Aula Específica: Proxecto Miró

Aula Específica: Merenda!!

Aula Específica: Proxecto Paxaros

De mans das profes da Aula Específica do Leliadoura, Elena e Cristina, chégannos outros 4 vídeos sobre as actividades que desenvolven cos rapaces, Lorena, Andrés e José Manuel, que iremos publicando ao longo dos próximos días. Comezamos hoxe co "Proxecto Paxaros"!!

Boas novas sobre a conexión a Internet

Parece que finalmente os esforzos por reclamar unha mellor conexión a Internet para o centro poden dar os seus froitos.

É esta, a pobre conexión a Internet, unha das carencias estruturais do IES Leliadoura, problema que se foi agravando a medida que foi crecendo o equipamento informático do centro e se foi xeralizando o uso das TIC como ferramenta docente. E é que unha conexión de 4 Mbps para un centro con case 400 ordenadores é claramente insuficiente. Para que vos fagades unha idea, hoxe en día calquera particular que viva no casco urbano de Ribeira pode contratar, só para o seu domicilio, unha conexión básica cunha velocidade de 20 Mbps.

Foi xa no pasado mes de marzo cando subimos ao tellado do centro cun par de técnicos enviados pola Consellería para facer un estudo de viabilidade dun enlace IP-OFDM, é dicir, para ver se era posible realizar unha conexión inalámbrica con algún outro organismo público situado no casco urbano de Ribeira, a través do cal se puidera mellorar a nosa conexión.

Finalmente a semana pasada, o asesor Abalar da zona e a Unidade de Atención a Centros (UAC) confirmaron que este enlace era posible desde as instalacións da Policía Local de Ribeira. Esta nova conexión substituiría a actual de 4Mbps por un enlace inalámbrico de ata 15Mpbs, o que segue sendo bastante precario pero que sen dúbida mellorará a conectividade do centro.

Actualmente, a implantación deste novo sistema está pendente da concesión do correspondente permiso por parte do Concello de Riveira, permiso que xa foi solicitado pola Consellería o pasado 27 de maio.
Agardamos que este derradeiro trámite administrativo non se dilate no tempo e poidamos disfrutar canto antes desta mellora largo tempo agardada.

Alumnado de ciclos do Leliadoura de prácticas en Europa

Neste curso 2012-13, por primeira vez, alumnado dos Ciclos Superiores de ASIR, DAM e AF do IES Leliadoura están a realizar as súas prácticas en diferentes empresas de países europeos como Malta e Portugal, a través da Carta Universitaria Erasmus.

De cara aos vindeiros cursos, o pasado 24 de maio de 2013 publicouse na paxina web do OAPEE a aprobación do Consorcio Erasmus Praxeuropa para o curso 2013/14.

O IES Leliadoura é un dos 16 centros de toda Galicia que participa neste consorcio, que disporá de 50 mobilidades para facilitar a realización do periodo de prácticas do alumnado de Ciclos Formativos en países europeos. 

Sorteo das rifas da Viaxe de Estudos

Hoxe venres 7 de xuño, levouse a cabo o sorteo para acadar os números gañadores das rifas da Viaxe de Estudos:

Os números premiados son os seguinte:

• 1º premio, "unha escapada pintoresca", para o nº 4559
• 2º premio, "unha escapada rústica", para o nº 7012
• 3º premio, "unha escapada rústica gastronómica", para o nº 9827

Para recoller o premio pasade pola vicedirección do IES Leliadoura co boleto premiado.

Prazo para recoller o premio: do 10 de xuño ao 10 de setembro

Parabéns aos gañadores/as!!

Alumnado de bacharelato representa "Saxo Tenor"

Os alumnos de 1º de bacharelato representaron o xoves 30 de maio na biblioteca do instituto a obra teatral de Roberto Vidal Bolaño "Saxo tenor".

Dirixidos pola profesora Helena López, alumnos dos dous gruipos de bacharelato fixéronllo pasar ben aos seus compañeiros representando unha escolma da obra de Vidal Bolaño. 

Tralo éxito alcanzado non descartamos que o vindeiro curso volvan saír ao escenario para actuar diante de tódolos seus compañeiros de centro.

Noraboa aos que traballaron para que esta representación se levase a cabo.

6 anos de vixencia dos libros de texto

No Diario Oficial de Galicia núm. 102, do xoves día 30 deste mes, publícase a Orde do 29 de maio de 2013 pola que se amplía a 6 anos o período de vixencia dos libros de texto e materiais curriculares para as ensinanzas de réxime xeral, contados desde a súa elección.

Na mesma orde tamén se di que os libros e materiais só se poderán substituír cando circunstancias excepcionais ou de carácter pedagóxico ou científico o aconsellen, e así o determine a xefatura territorial correspondente desta consellería, logo do informe de inspección educativa, previa solicitude do centro.